1ºESO navega con Rumbo

O alumnado de 1º de ESO participou este mércores 4 de febreiro nunha charla formativa enmarcada no programa Navega con Rumbo, unha iniciativa da Xunta de Galicia dirixida a promover un uso responsable, seguro e consciente de Internet e das redes sociais. A charla foi impartida por Daniel Medina Méndez, docente con amplia experiencia en temas relacionados coa informática e as comunicacións e profesor de informática forense.

Durante a sesión, o alumnado reflexionou sobre cuestións clave como a protección da súa identidade dixital, a importancia da privacidade en liña, os riscos asociados ao uso inadecuado das tecnoloxías e a necesidade de manter unha actitude respectuosa e crítica no contorno dixital. A través de exemplos próximos á súa realidade, fomentouse tamén o pensamento responsable e a toma de decisións seguras cando navegan por Internet.

Esta actividade resulta especialmente relevante nestas idades, xa que contribúe a dotar ao alumnado de ferramentas fundamentais para desenvolverse con autonomía e criterio nun mundo cada vez máis dixitalizado. Dende o centro valoramos moi positivamente este tipo de iniciativas, que complementan o noso labor educativo e axudan a formar cidadáns e cidadás dixitalmente responsables.